វិជ្ជាបោះជំរំ

I. គំរោងមុនពេលបោះជំរំៈ
*ការសង្កេតជាមុនៈ
-បញ្ហាសុខភាពនៅតាមតំបន់ដែលទៅបោះជំរំ
-បញ្ហាជ្រើសរើសទីកន្លែងបោះជំរំ
-បញ្ហាទឹក ឈើ អុស
-បញ្ហាផ្គត់ផ្គង់ភ័ស្តុភារ ។
១.តើនៅតំបន់មានជំងឺគ្រុនចាញ់ឬទេ? ត្រូវធ្វើការអង្កេតដោយសួរមន្រ្តីសុខាភិបាលនៅតំបន់នោះ ។
-មានជំងឺអុត ពិស អាសន្នរោគ គ្រុនពោះវៀន ឬទេ?
បើតំបន់នោះនៅមានមន្ទិលផ្នែកសុខភាព ឬសុវត្ថិភាព (មីន) យើងអាចទៅបោះជំរំបាន លុះត្រាតែមាន ការព្រមព្រៀងធានាពីអាជ្ញាធរដែលមានពាក់ព័ន្ធប្រចាំតំបន់នោះជាមុនសិន ។

២.ក.​ តំបន់សុខសប្បាយ
-កន្លែងមានភ្នំៈ កុំបោះជំរំនៅកន្លែងទំនាប ឬបាតជ្រលង
-កន្លែងបីរបោះ: កុំបោះជំរំក្រោមដើមឈើ (ភ្លៀងមានទឹកស្រក់ មែកឈើបាក់លើ)
-នៅទីវាលៈ  បោះជំរំនៅក្រៅវាលស្មៅដែលជាជំរកនៃសត្វ និងជាចំណីនៃភ្លើងព្រៃ
  ខ.នៅកន្លែងដែលមានជំងឺឆ្លងៈ
បើគេបានសំអាតកំចាត់ជំងឺរួចហើយៗនៅថែទាំតទៅទៀត អាចចាត់ទុកជាកន្លែងគ្មានជំងឺដែរ បើពុំ ដូច្នេះទេត្រូវចៀសវាងនៅឆ្ងាយពីភូមិ យ៉ាងតិច ២គ.ម ។
ចៀសវាងនៅអោយឆ្ងាយពីផ្លូវ និងមេទឹកដែលមានអ្នកភូមិមកដងទឹក ព្រោះមូសតាមខាំអ្នកភូមិនោះ ហើយមកខាំយើងដែរ ។

៣.ក.ទឹក
ត្រូវជាទឹកថ្លា ហើយហូរជានិច្ច ហើយចៀសវាងទឹកមិនហូរជាដាច់ខាត ។
-ទឹកត្រូវអោយមានបរិបូណ៌សរាប់ដាំបាយ ទទួលទាន លុបលាងខ្លួន បោកខោអាវ
-មេទឹកមិនត្រូវឆ្ងាយពីជំរំហួសពី ២០០ម ទេពីព្រោះធ្វើអោយមានការខ្ជិលច្រអូស និងមានការខ្វះ អនាម័យ ។
-ទឹកសំរាប់ផឹក ធ្វើអោយសុទ្ធស្អាត ឬដាំអោយពុះ ដោយទុកដាក់អោយមានគំរប ។
  ខ.ឈើ អុស
-ឈើសំរាប់ធ្វើការតុបតែង គឺចៀសវាងប៉ះពាល់ដល់ឈើមានផលប្រយោជន៍ដែលគេរក្សាទុក ឬធ្វើ អោយខូចដល់បរិស្ថាន ។
-ឈើស្ងួតសំរាប់ដុតគ្រប់គ្រាន់

៤.ការផ្គត់ផ្គង់ភ័ស្តុភារ
-ត្រូវបរិភោគម្ហូបអាហារឆ្ងាញ់
-អោយបរិភោគផ្លែឈើស្រស់អោយបានច្រើន

ក.ប្រភេទជំរំ
-ជំរំមួយកន្លែងៈ ជាជំរំគ្មានការផ្លាស់ប្តូរក្នុងរយៈពេលបោះជំរំនោះ ក្នុងរយៈពេលកំណត់ ។
-ជំរំចល័តៈ ជាជំរំផ្លាស់ប្តូរកន្លែងជាច្រើនដង យោងតាមតម្រូវការនៃការសិក្សានៃមុខវិជ្ជា ឬការប្រែប្រួល នៃស្ថានភាពទីតាំង បរិយាកាស ។ល។
-ជំរំលើកកញ្ជើដើរៈ ជាជំរំប្តូរកន្លែងរាល់ថ្ងៃ ។ ច្រើនប្រើសំរាប់ក្រុម ក្នុងការអនុវត្ត ការរុករក ។
II. ការកំណត់ជាក់លាក់មុននឹងទៅបោះជំរំៈ
១. ជំរើសកន្លែងៈ
-ធ្វើអង្កេត (សុខភាព, ជំងឺ...)
-មធ្យោបាយដឹកនាំ
-លទ្ធភាពផ្គត់ផ្គង់ ភស្តុភារ
-មេទឹក ឈើ អុស

២. សេចក្តីអនុញ្ញាតៈ
-សុំច្បាប់បោះជំរំពីស្នងការប្រចាំភូមិភាគ
-សុំច្បាប់ពីអ្នកអាណាព្យាបាលនៃកូនក្រុម

៣.ថវិកា
-ត្រូវរៀបចំគិតគូរអោយបានហ្មត់ចត់ដោយប្រជុំមេក្រុមផងមុននឹងសំរេច ព្រោះវាជារឿងធំ ហើយ ស្មុគស្មាញនាំអោយលឺមាត់កទៀតផង ។

ក.ប្រាក់ចំណាយៈ
-ចំណាយក្នុងការរៀបចំសម្ភារៈបោះជំរំ
-ចំណាយលើយានជំនិះ
-ចំណាយលើអាហារ
-ចំណាយផ្សេងៗ

ខ.ចំណូល
ត្រូវសរុបគំរោងចំណាយទាំងអស់ដែលបានពិភាក្សាយ៉ាងល្អិតល្អន់នោះ យកមកចែកនឹងចំនួន កាយរឹទ្ធិដែលត្រូវទៅបោះជំរំ អោយចេញជាវិភាគទាន រួចប្រមូលសំរាប់ធ្វើជាប្រាក់ចំនូល ។​ វាជា ការពិបាក ព្រោះគ្រួសារខ្លះ ទីទ័លក្រ ពុំអាចរកលុយមកបង់តាមកំរិតបានទតេ ផ្ទុយទៅវិញ គ្រួសារ ដែលធូរធាអាចស្នើសុំចេញលើសពីកំរិតវិភាគទានបាន ។ ដូច្នេះត្រូវធ្វើបញ្ជី អោយបានហ្មត់ចត់ ហើយចំនួនវិភាគទានត្រូវអោយបានចាប់ពី 50% ឡើងទៅទើបអាចអនុវត្តបាន ។ អ្នកអាចទទួល ប្រាក់ពីគ្រួសារដែលធូរធារយកទៅប៉ះប៉ូវគ្រួសារដែលទីទ័លបាន  តែបើនៅខ្វះខាតទៀត សុំកុំ​ញញើតនឹងធ្វើពាក្យសុំទៅហិបប្រាក់នៃគណៈកម្មាធិការកណ្តាល ឬតំបន់(ខេត្ត) អោយគេជួយដោះ​ស្រាយ ដោយបញ្ជាក់ហេតុផលអោយបានត្រឹមត្រូវ និងច្បាស់លាស់ ។
 ៤. សម្ភារៈ
    អ្នកត្រូវជួសជុលឬរកបន្ថែមការខ្វះខាតដោយសម្ភារៈខ្លះរេចរិល ឬបាត់ ឬភ្លេចចោល នូវសម្ភារៈ​ខ្លះដែលមិនចាំបាច់នៅពេលដែលចេញទៅបោះជំរំកន្លងមក ។​ ដូច្នេះត្រូវតែនឹកគិតអោយបានសព្វគ្រប់ មុននឹងចាប់ផ្តើម ។
ក-សម្ភារៈរបស់កងល្បាត (Troupe)
-ទង់ជាតិខ្មែរ
-ទង់សាសនា
-ទង់ប្រចាំកង
-កញ្ចែ
-បទបញ្ជា
-កម្មវិធី
-សំពៀតសំរាបើដាក់ឱសថ (តាមតម្រូវការជាក់ស្តែង)
-សៀវភៅ និងទស្សនាវដ្តី
-សៀវភៅបច្ចេកទេសកាយរឹទ្ធិ
-សៀវភៅចម្រៀង
-សៀវភៅល្បែង
-ម្ជុល, ចេស... ។ល។
ខ-សម្ភារៈរបស់ក្រុមល្បាត
-តង់
-បង្គោលតង់
-ខ្សែ
-ចង្កៀង
-ពូថៅ
-កាំបិត
-ប៉ែល
-ចបកាប់បត់បាន
-សម្ភារៈចង្រ្កានបាយ
-ធុងទឹក ។ល។
គ-សម្ភារៈផ្ទាល់ខ្លួនម្នាក់ៗ
-សម្ភារៈដំណេក
-ប្រដាប់ប្រដា ប្រើប្រាស់ផ្ទាល់ខ្លួន
*សមាជិកក្រុមល្បាតម្នាក់ៗ ត្រូវមានស្បែកជើង១សំរាប់ និងខោអាវស្អាតខ្ញង់១សំរាប់ សំរាប់ពាក់​ពេលវិលត្រឡប់ចូលមកជួបគ្រួសារវិញ ពីព្រោះច្បាប់មិនអនុញ្ញាតអោយស្លៀកពាក់កខ្វក់ដាច់ខាត កាលណាវិលមកគេហដ្ឋានវិញ ។
*ទោះបីជាអ្នកដឹងថា សម្ភារៈទាំងនោះត្រូវបានរៀបចំរួចហើយក៏ដោយអ្នកត្រូវត្រួតពិនិត្យជាថ្មីម្តង​ទៀត មុននឹងចេញដំណើរគឺមិនអនុញ្ញាតអោយមានការខ្វះខាតជាដាច់ខាត ។
៥. ក្រុមភ័ស្តុភារ :
អ្នកត្រូវតែគិតថា​ជំរុំគឺជាកន្លែងអប់រំលក្ខណៈចរិតក្មេង ។ ការបានសំរេចផលក៏ស្ថិតនៅលើការ​បរិភោគដែរ ហេតុនេះអ្នកត្រូវអោយសមាជិកក្រុមល្បាតអ្នកបរិភោគអោយបានសមរម្យ ដោយមិន​ត្រូវសន្សំ ឬត្បិតត្បៀតម្ហូបអាហារអោយហួសហេតុពេកទេ ផ្ទុយទៅវិញអ្នកត្រូវអោយបរិភោគអោយ​បានច្រើន ហើយឆ្ងាញ់ផង ប៉ុន្តែក៏មិនត្រូវខ្ជះខ្ជាយដែរ ។
តាមច្បាប់គេអាចរកភ័ស្តុភារដែលមិនរលួយស្អុយ បំរុងទុកអោយហើយមានអង្ករ សណ្តែក ស្ករ ដំឡូង ។ល។ ទុកជាមុនព្រោះយើងទិញច្រើននៅនឹងកន្លែងវាមានតម្លៃថោកជាងនៅតំបន់ដាច់​ស្រយាលដែលយើងទៅបោះជំរំនោះ ។
៦. ឱវាទចុងក្រោយៈ
ការរៀបចំរបស់អ្នកត្រូវបានចប់ដោយបរិបូណ៌ អ្វីៗត្រូវបានសំរេចជាស្រេច ។ បន្ទាប់ពីរៀបចំសម្ភារៈ​ហើយ អ្នកត្រូវចាត់អោយមានអ្នកទទួលខុសត្រូវរៀងៗខ្លួនទៀត ។ អ្នកជាអ្នកដឹកនាំជំរំ អ្នកត្រូវ​ទទួលខុសត្រូវលើសមាជិកជំរំទាំងអស់ ។
*សំរាប់មេក្រុមល្បាត​ (Partol Leader) ម្នាក់ៗត្រូវទទួលរ៉ាប់រងថែទាំសម្ភារៈក្រុមល្បាតរបស់ខ្លួន ហើយត្រូវមានលទ្ធភាពតែងតាំងសមាជិកក្រុមម្នាក់ អោយទទួលខុសត្រូវសម្ភារៈដឹងភ័ស្តុភាររបស់​ក្រុម ។ ម្នាក់ទៀតធ្វើលេខាធិការ ម្នាក់ទៀតខាងចង្រ្កានបាយ (ចុងភៅ) ម្នាក់ទៀតខាងសាងសង់ និងរុះរើតង់ ម្នាក់ទៀតជាហិរញ្ញឹក ម្នាក់ទៀតកាន់កាប់ថ្នាំពេទ្យ ។ល។
*កុំភ្លេចយកទៅជាមួយនូវៈ
-ច្បាប់អនុញ្ញាតអោយចេញទៅបោះជំរុំរបស់ស្នងការភូមិភាគ
-ច្បាប់ទទួលដឹង និងយល់ព្រមរបស់អជ្ជាធរដែនដី
-អត្តសញ្ញាណប័ណ្ណកាយរឹទ្ធិ ឬលិខិតចាត់តាំង
-សំបុត្រធានារ៉ាប់រងផ្សេងៗ
-ថវិកាបំរុងមួយចំនួន ។ល។
ការបរិយាយទាំងអម្បាលមានខាងលើ វាគឺជាគំរោង ចំណែកការអនុវត្តជាក់ស្តែង គឺសកម្មភាពនៅ​ក្នុងជំរំដែលអ្នកបាន កំពុង ឬនឹងត្រូវឆ្លងកាត់ ។​ ប្រធានជំរុំ​ (មេកង) ត្រូវមានលក្ខណៈវាងវៃ ប៉ិនប្រសព្វ និង​​ពូកែ​សង្កេត ពីព្រោះការរៀបចំ និងគ្រប់គ្រងជំរុំស្ថិតក្នុងការទទួលខុសត្រូវរបស់អ្នក ទាំងការបែងចែកទីតាំងតាមក្រុម ការយាមកាមពេលយប់ បទបញ្ជាផ្ទៃក្នុងជំរំ ការរក្សាអនាម័យ និងទំនាក់ទំនងទូទៅជាដើម ។ អត្ថបទនៃមេរៀននេះវាពុំទាន់គ្រប់គ្រាន់ឬមានភាពពេញលេញ១០០% នៅឡើយទេ គឺគ្រាន់តែជាគោលការណ៍សំរាប់ការការអនុវត្តប៉ុណ្ណោះ ចំណែកភាពពីស្តារ​របស់វា អាស្រ័យនៅលើ គំនិតច្នៃប្រឌិត (Initiative) របស់ប្រធានជំរុំផ្ទាល់ ។​ សង្ឃឹមថា គំនិតដ៏ស្តួច​ស្តើង​នេះជាវិភាគទានយ៉ាងសំខាន់មួយសំរាប់កសាង និងអភិវឌ្ឃខេមរៈកុលបុត្រកុលធីតារបស់​យើងអោយក្លាយទៅជាកាយរឹទ្ធិដ៏ល្អ ដូចកាយរឹទ្ធិឯទៀតៗ នៅលើពិភពលោកជាមិនខានឡើយ។

បទចំរៀងរបស់សមាគមជាតិកាយរឹទ្ធិកម្ពុជា

វិធីសង្រ្គោះបន្ទាន់

របួស ការរុំរបួស ការថែទាំរបួស

និយាយថារបួស គឺនៅពេលដែលស្បែកត្រូវដាច់ រលាត់ កកិត ខាំរហែក រឺមុតធ្លាយដោយវត្ថុពីក្រៅ ចូលដល់សរសៃ វិញ្ញាណ សរសៃឈាម រឺប៉ះនិងសរីរាង្គផ្សេងៗ ។

នៅពេលដែលត្រូវរបួស តែងតែមានការៈ

-ឈឺចាប់ខ្លាំង

-ហើមក្រហម

-ឆ្លងរោគ

+របៀបប្រើបង់រុំរបួសៈ

-រុំរបួសនិងបង់អោយតឹងល្មម ។

-ទ្រ រឺទប់កន្លែងដែលត្រូវរុំបង់ ។

-ឈរពីមុខអ្នករបួសដែលអង្គុយ រឺដេក ។

-រុំរបួសនិងបង់អោយបានពីរជុំ ដើម្បីសង្កត់ភ្ជាប់មុខរបួសកុំ​អោយរបូត ។

+វិធីលាងរបួសៈ

១. មុនដំបូងត្រូវ ពិនិត្យមុខរបួស តើធំ ឬតូច ជ្រៅ ឬរាក់ មានឈាមហូរច្រើន​ឬតិច ។

២.អ្នកសង្រ្គោះត្រូវលាងដៃអោយស្អាត ឬពាក់ស្រោមដៃ​មុននឹងប៉ះពាល់មុខរបួស ។

៣. កោររោមជុំវិញមុខរបួស (បើអាចធ្វើបាន ធ្វើដោយ​សំភារៈដែលសំលាប់មេរោគរួច ។

៤. លាងរបួស និងទឹកឆ្អិន ស្អាត ឬទឹកធម្មតា លាយអំបិល ឬទឺកសាប៊ូ ឬទឹកពែរម៉ង់កាណាត មួយក្រាម លាយទឹក​មួយលីត្រ ។

៥. យកដុំកុំប្រេសតូច ឬក្រណាត់ស្អាតជ្រលក់ទឹកមកជូត​កណ្តាលមុខរបួសចេញ ធ្វើចលនាពីក្នុងមកក្រៅ យកដី ឬធូលីចេញពីមុខរបួស ។

៦. ហាមដកយកវត្ថុដែលមុតចេញពីមុខរបួស បើសិនជាមាន

៧. គ្របមុខរបួសដោយបន្ទះបង់ស្អិតក៏បានប្រសិនបើរបួស តូចតាច ។

៨. អ្នកអាចយកបង់រុំច្រើនត្រួតពីលើមុខរបួស ។

+ការរុំរបួសលើប្រអប់ដៃៈ

១. អ្នកសង្រ្គោះត្រូវលាងដៃអោយស្អាត ឬពាក់ស្រោមដៃមុន​នឹងប៉ះពាល់របួស ។
២. សំអាតរបួសដោយទឹកសាប៊ូ ។
៣. គ្របមុខរបួសដោយក្រណាត់ស្អាត ។
៤. យកបង់រុំព័ទ្ធពីរជុំ នៅលើដៃ បន្ទាប់មករុំប្រដេញបន្ត​បន្ទាប់រហូតជិតមុខរបួស ។
៥. ចុងបង់ ត្រូវបញ្ចប់ត្រង់ផ្នែកខាងលើនៃកដៃ ។

+ការរុំរបួសនៅកែងដៃៈ

១. អ្នកសង្រ្គោះត្រូវលាងដៃអោយស្អាត មុខនឹងប៉ះពាល់មុខ​របួស ។

២. សំអាតរបួសដោយទឹកសាប៊ូ ។
៣. គ្របមុខរបួសដោយក្រណាត់ស្អាត ។
៤. រុំព័ទ្ធពីក្រោមរបួស ដោយដាក់ចុងបង់ពីលើកុំប្រេសពីរដុំ ហើយរុំបន្តដោយធ្វើចលនាពីក្នុងមកក្រៅ ។
៥. ជុំនីមួយៗត្រូវជាន់លើគ្នា២/៣ដង នៃជុំ​មុន ។
៦. ចុងបង់ដែលរុំបញ្ចប់ត្រូវចងផ្នែកខាងលើដើមដៃ ឬកំភួនដៃនៃមុខរបួស ។

+ការរុំរបួសនៅលើប្រអប់ជើងៈ

១. អ្នកសង្រ្គោះត្រូវលាងដៃអោយស្អាត ឬពាក់ស្រោមដៃមុន​នឹងប៉ះពាល់របួស ។

២. ពាក់ស្រោមដៃ មុខនឹងប៉ះពាល់មុខរបួស ។

៣.​ សំអាតមុខរបួសដោយទឹកសាប៊ូ ។

៤.​ គ្របមុខរបួសដោយក្រណាត់ស្អាត ។

៥. ដាក់ចុងបង់ពីលើកុំប្រេស ឬក្រណាត់ស្អាត ។
៦. រុំពីលើកុំប្រេសអោយបានពីរជុំក្នុងជំហ៊ានដំបូង ។

+ការរុំរបួសនៅក្បាលជង្គង់ៈ
១. អ្នកសង្គ្រោះត្រូវលាងដៃអោយស្អាត ឬពាក់ស្រោមដៃមុន​នឹងប៉ះពាល់មុខរបួស ។
២. សំអាតមុខរបួស​ដោយទឹកសាប៊ូ ។
៣. គ្របមុខរបួសដោយរុំកុំប្រេស ឬក្រណាត់ស្អាត ។

៤. រុំព័ទ្ធពីក្រោមរបួស ដោយដាក់ចុងបង់ពីលើកុំប្រេសពីលើ​ក្រណាត់គ្របមុខរបួស ហើយរុំពីរជុំក្នុងជំហ៊ានដំបូងបន្ត ហើយរុំបន្ត​ដោយ​ធ្វើ​ចលនាពីក្នុងមក​ក្រៅ ។

៥. ជុំនីមួយៗត្រូវជាន់លើគ្នា ២/៣ដងនៃជុំមុន ។

៦. ចុងបង់ដែលរុំបញ្ចប់ត្រូវចងផ្នែកខាងលើដើមដៃ​នៃមុខ​របួស ។

 

+វិធីថែទាំមុខរបួសទូទៅៈ១. រុំបង់អោយតឹងល្មម ។
២. ប្រាប់អ្នករងគ្រោះអោយថែរក្សាមុខរបួស និងបង់រុំអោយ​នៅ​ស្ងួតជានិច្ច ។
៣. កុំអោយមុខរបួសប៉ះទឹក ។
៤. ហាមអ្នករងគ្រោះស្រាយបង់ចេញ ។
៥. បង់រុំត្រូវផ្លាស់ប្តូរពីរថ្ងៃម្តង បើរបួសមានខ្ទុះ ឬមានទឹក​សើម ។
៦. ពេលរបួសពិតជាត្រូវបើកចំហរដើម្បីឲរបួសឆាប់សះ។

ច្បាប់-ពិធីកាយរឹទ្ធិ-ពាក្យសច្ចា-បាវចនារបស់សមាគមកាយរឹទ្ធិកម្ពុជា

ច្បាប់កាយរឹទ្ធិៈ

១. កិតិ្តយសនៃកាយរឹទ្ធិ គឺជាការទុកចិត្តពីអ្នកដទៃ ។
២. កាយរឹទ្ធិស្មោះត្រង់ ។
៣. កាយរឹទ្ធិបំរើ និងសង្រ្គោះមនុស្សជាតិ ។
៤.​ កាយរឹទ្ធិជាមិត្តភក្តិ​ និងជាបងប្អូននិងកាយរឹទ្ធិដទៃទៀត ។

៥. កាយរឹទ្ធិចេះគួរសម និងស្តាប់ឱវាទ ។

៦. កាយរឹទ្ធិរីករាយ និងចិត្តល្អ ។

៧. កាយរឹទ្ធិសន្សំសំចៃ ។

៨. កាយរឹទ្ធិក្លាហាន ។
៩. កាយរឹទ្ធិគោរពបូជាតាមជំនឿសាសនារៀងៗខ្លួន ហើយមានចិត្តស្រលាញ់មនុស្សជាតិ សត្វ និងធម្មជាតិទាំង​ឡាយ ។
១០. កាយរឹទ្ធិស្អាតស្អំទាំងចិត្តគំនិត ទាំងពាក្យសំដី និងទាំងអំពើ ។

ពិធីកាយរឹទ្ធិៈ

ពិធីកាយរឹទ្ធិមានបីគឺៈ
១.ពិធីសាសនា
២.ពិធីគោរពទង់ជាតិ
៣.ពិធីសច្ចាប្រណិធាន
ពិធីទាំងបីនេះតែងមានវត្តមានក្នុងពិធីបំពាក់កន្សែងដល់នវកាយរឹទ្ធិ​ និងពិធីប្តូរកន្សែង ។

*ពិធីសាសនាៈ

ពិធីនេះតំរូវអោយយើងសូត្រធម៌ និងនមសការ ។

*ពិធីគោរពទង់ជាតិៈ

ពិធីនេះតំរូវអោយយើងច្រៀងចំរៀងគោរពទង់ជាតិ ។

*ពិធីសច្ចាប្រណិធានៈ

ពិធីនេះតំរូវអោយយើងធ្វើការសច្ចាតាមពាក្យខាងក្រោមៈ

ដោយយកកិក្តិយសខ្ញុំជាសាក្សី ខ្ញុំសូមសច្ចាថានឹងៈ
-គោរពបូជាព្រះពុទ្ធ ព្រះធម៌ ព្រះសង្ឃនិងបំរើមាតុភូមិរបស់ខ្ញុំអោយអស់ពីចិត្តពីថ្លើម ។
-ជួយសង្រ្គោះមនុស្សជាតិគ្រប់កាលៈទេសៈ ។
-គោរពច្បាប់កាយរឹទ្ធិយ៉ាងហ្មត់ចត់ ។
១. មេៈ​ តើអ្នកចង់បានអ្វី?
កាយរឹទ្ធិៈ ចង់ទៅជាកាយរឹទ្ធិ ។
២. មេៈ ដើម្បីអ្វី?
កាយរឹទ្ធិៈ ដើម្បីគោរពបូជាអោយអស់ពីចិត្តពីថ្លើម របស់ខ្ញុំចំពោះជាតិ សាសនា និងព្រះមហាក្សត្រ។
៣. មេៈ បំរើដោយវិធីយ៉ាងណា?

កាយរឹទ្ធិៈ ដោយរស់នៅក្នុងច្បាប់កាយរឹទ្ធិ ។

៤. មេៈ រយៈពេលប៉ុន្មាន?
កាយរឹទ្ធិៈ រហូតតទៅ ។
៥. មេៈ តើអ្នកមានសង្ឃឹមនិងរង់ចាំទទួលប្រយោជន៍អ្វីខ្លះពីកាយរឹទ្ធិ?
កាយរឹទ្ធិៈ គ្មានសោះឡើយ ។
៦. មេៈ តើអ្នកចេះច្បាប់កាយរឹទ្ធិឬទេ?
កាយរឺទ្ធិៈ យើងខ្ញុំចេះ ។
៧. មេៈ ដូច្នេះយើងសូត្រច្បាប់នេះទាំងអស់គ្នា ។
កាយរឹទ្ធិៈ សមាជិកទាំងអស់សូត្រច្បាប់កាយរឹទ្ធិដូចមានខាងលើ ។
៨. មេៈ អ្វីទៅជាគុណធម៌សំខាន់ៗរបស់កាយរឹទ្ធិ?
កាយរឹទ្ធិៈ សេចក្តីស្មោះត្រង់ ភក្តីភាព និងភាពបរិសុទ្ធ ។
៩. មេៈ អ្វីទៅជាកាតព្វកិច្ចរបស់កាយរឹទ្ធិ?
កាយរឹទ្ធិៈ ជួយសង្រ្គោះមនុស្សជាតិ គ្រប់កាលៈទេសៈ ។

១០. មេៈ ដោយទុកចិត្តទៅលើការយល់ដឹងរបស់អ្នកក្នុងនាមគណកម្មាធិការប្រតិបត្តិថ្នាក់ជាតិ និងទទួលអោយអនុវត្តទៅតាមពាក្យសច្ចាប្រណិធានទាំងនេះ ។

កាយរឹទ្ធិៈ ដោយយកកិត្តិយសរបស់ខ្ញុំជាសាក្សី ខ្ញុំសូមសច្ចាថានឹងៈ
               -គោរពបូជាអោយអស់ពីចិត្តពីថ្លើម របស់ខ្ញុំចំពោះជាតិ សាសនា និងព្រះមហាក្សត្រ
               -សង្រ្គោះមនុស្សជាតិគ្រប់កាលៈទេសៈ



ការសច្ចាប្រណិធានរបស់នវកាយរឹទ្ធិរបស់កងឯកភាពវិទ្យាល័យ ឥន្រ្ទទេវី



               -គោរពច្បាប់កាយរឹទ្ធិ​ និងថែរក្សាខ្លួនប្រាណរបស់ខ្ញុំអោយមានកាយសម្បទាមាំមួន ចិត្ត គំនិតភ្ញាក់រលឹកនិងមានសីលធម៌ខ្ពស់ ។

មេៈ ចាប់ពីពេលនេះតទៅអ្នកនឹងក្លាយទៅជាសមាជិកពេញសិទ្ធិរបស់សមាគមជាតិកាយរឹទ្ធិកម្ពុជា យើងហើយ ។

 សញ្ញាកាយរឹទ្ធិៈ

 ​សញ្ញាទាំងនេះគឺសញ្ញាកាយរឹទ្ធិ ។

ម្រាមដៃមេដាក់លើម្រាមដៃកូនបានន័យថា មេត្រួតត្រាលើកូនចៅ ។

-ម្រាមដៃចង្អុល តំណាងអោយ ការជួយខ្លួនឯង ។

-ម្រាមដៃកណ្តាល តំណាងអោយ ការជួយមិត្តភក្តិ ។

-ម្រាមដៃនាង តំណាងអោយ ការជួយសង្គម ។

សញ្ញាទាំងនេះយើងប្រើក្នុងការសច្ចាប្រណិធាន និងជាសញ្ញាស្ងៀមស្ងាត់ ។

១.ការប្រើប្រាស់សញ្ញាកាយរឹទ្ធិក្នុងពិធីសច្ចាប្រណិធានៈ តំរូវអោយកាយរឹទ្ធិទាំងអស់ លើកឡើងជាសញ្ញាត្រីកោណ (ដូចរូបភាព) ហើយសូត្រពាក្យសច្ចាប្រណិធាន ។

២.ការប្រើប្រាស់សញ្ញាកាយរឹទ្ធិជាសញ្ញាអោយស្ងៀមស្ងាត់ៈ ប្រើប្រាស់ក្នងអំឡុង ពេលសមាជិកមានភាពច្របូកច្របល់យើងអាចបញ្ជាអោយស្ងាត់ ដោយលើកដៃជាសញ្ញាកាយរឹទ្ធិ (ដូចរូបភាពខាងលើ) ឡើងបង្ហាញអោយសមាជិកទាំងអស់ឃើញ ។

របៀបធ្វើស្វាធ្យាយជយន្តោៈ

កាយរឹទ្ធិទាំងអស់ត្រូវបោះជើងស្តាំមកក្រោយចំងាយ ២៥ស.ម ហើយលុតជង្គង់ ៉អង្គុយលើកែង ជើងស្តាំ៉ លើកដៃប្រណមស្មើច្រមុះ មុខឱនបន្តិច ។ ពេលលឺមេស្រែកបញ្ជាថាៈ

-ជង្គង់               កាយរឹទ្ធិស្រែកថា               លុត

-ដៃ                                -                              ប្រណម

-ដោះ                            -                              មួក

-ពាក់                             -                              មួក

-ក្រោក                          -                              ឈរ

-កាយរឹទ្ធិ                      ​ -                              ប្រុងជានិច្ច

របៀបធ្វើស្វាធ្យាយជន្តោ

* សមាជិកម្នាក់ៗ ត្រូវស្រែកអោយបានព្រមៗគ្នា និងអនុវត្តអោយបានព្រមៗគ្នាដែរ ។

យល់ដឹងៈ

-ការរកសមាជិកបន្ថែមអោយក្រុម ជាភារកិច្ចរបស់សមាជិកក្រុមល្បាតម្នាក់ៗ ។ កាយរឹទ្ធិម្នាក់ៗ ត្រូវតែបំផុស និងជួយមិត្តភក្តិរបស់ខ្លួនអោយចូលរួមក្នុងក្រុមជាមួយ ។ ត្រូវមានសំលៀកបំពាក់ ស្អាតបាត ចរិយាសុភាពរាបសារ ថ្លៃថ្នូរ ប្រាជ្ញាឈ្លាសវៃ សមត្ថភាព អំពើល្អ ។ ពេលទាក់ទងមិត្ត ម្នាក់ត្រូវបង្រៀនអោយគេចេះវិជ្ជាកាយរឹទ្ធិៈ ស្គាល់សមាគមជាតិកាយរឹទ្ធិ ស្គាល់សញ្ញាកាយរឹទ្ធិ ចេះគំនាប់ ចេះចាប់ដៃ ចេះច្បាប់ ចេះចំណង ចេះចំរៀង សំខាន់ៗ និងអោយគេចូលរួមប្រជុំជាមួយ ក្រុមល្បាត ២ដងយ៉ាងតិច ។
-អោយគេបំពេញពាក្យសុំចូល (តាមគំរូភ្ជាប់)
-យកពាក្យសុំប្រគល់អោយមេកងកាយរឹទ្ធិ ដើម្បីពិនិត្យ សំរេច ។
-រៀបចំពិធីធ្វើសច្ចាប្រណិធាន ។
-អ្នកដែលបានរកសមាជិកបន្ថែមអោយក្រុមបាន ៨នាក់ និងត្រូវតំលើងជាប្រធានក្រុមល្បាត ។
*ត្រូវរៀបចំកម្មវិធីអោយនវកាយរឹទ្ធិ ចេះស្ទាត់របៀបចាក់កង កន្សែង និងអនុវត្តសាកល្បងពិធីសច្ចា ប្រណិធាន ។
*បង្ហាត់ចំរៀងគោរពទង់ជាតិ ចំរៀងលាគ្នា ...។

រចនាសម័្ពន្ធយុវជនវិទ្យាល័យ ឥន្រ្ទទេវី

ប្រវត្តិកងឯកភាពកាយរឹទ្ធិវិទ្យាល័យឥន្រ្ទទេវី

ប្រវត្តិសមាគមជាតិកាយរឹទ្ធិកម្ពុជា

សម្តេចមហាសេនាបតីតេជោ ហ៊ុន សែន
ប្រធានកិតិ្តយសសមាគមជាតិកាយរឹទ្ធិកម្ពុជា



ឯកឧត្តមឧបនាយករដ្ឋមន្រ្តី សុខ អាន
ប្រធានក្រុមប្រឹក្សាសមាគមជាតិកាយ​រឹទ្ធិកម្ពុជា



ឯកឧត្តម ជ័យ ចាប
ប្រធានស្នងការសមាគមជាតិកាយរឹទ្ធិកម្ពុជា

សមាគមជាតិកាយរឹទ្ធិកម្ពុជាកើតឡើងដោយការបញ្ចូលគ្នារវាងអង្គការខេមរកាយរឹទ្ធិកម្ពុជា (Scout Organization of Cambodia) និងខេមរកាយរឹទ្ធិកម្ពុជា (Cambodian Scout) នៅក្នុង ខែសីហា ឆ្នាំ២០០៥ ។ ថ្ងៃទី០១ ខែកក្កដា ឆ្នាំ២០០៨ សមាគមជាតិកាយរឹទ្ធិកម្ពុជាបានក្លាយទៅជាសមាជិករបស់ចលនា​អង្គការកាយរិទ្ធិពិភពលោក [The World Organization of the Scout Movement (WOSM)] ។​ ក្នុងឆ្នាំ២០០៧ សមាគមជាតិកាយរឹទ្ធិកម្ពុជាមានសមាជិកចំនួន ៣,៧៦៣នាក់ ។

ប្រវត្តិកាយរឹទ្ធិកម្ពុជា

កាយរិទ្ធិដំបូងមានឈ្មោះថា អង្គការខេមរកាយរឹទ្ធិកម្ពុជា ត្រូវបានបង្កើតឡើងនៅក្នុងឆ្នាំ១៩៣៤ ក្រោមការដឹកនាំរបស់ ព្រះអង្គម្ចាស់ ស៊ីសុវត្ថិ មុនីរ៉េត ជាមួយថ្នាក់ដឹកនាំផ្សេងទៀត ។ ជំនាន់ដំបូង នៃខេមរកាយរឹទ្ធិកម្ពុជាបានពង្រីក និងផ្សព្វផ្សាយ​ទៅដល់៧-៨​ខេត្ត ក្រុង និងមានសមាជិកច្រើន ជាង ១០០០នាក់ ។

លោក​ André Lefevre​ ជាប្រធានស្នងការកាយរឹទ្ធិបារាំង បានរៀបចំការហ្វឹកហាត់បោះជំរំដល់មេកង កាយរឹទ្ធិបារាំងទាំង៦០ដែលកំពុង​បំពេញភារកិច្ចនៅឥណ្ឌូចិន ។ ចុងឆ្នាំ១៩៣៧ កាយរិទ្ធិបារាំងបាន បញ្ជូនលោក Raymond Schlemmer មកកាន់ ប្រទេស កម្ពុជា ឡាវ វៀតណាម ដែលជាប្រទេសក្នុង ឥណ្ឌូចិន ដើម្បីពិនិត្យ និងរៀបចំសហព័ន្ធសមាគមកាយរឹទ្ធិឥណ្ឌូចិន​ (Indochina Federating of Scouting Associations, FIAS)។

ក្នុងអំឡុងឆ្នាំ ១៩៣៩ ដល់ឆ្នាំ ១៩៤៥ បញ្ហានយោបាយបានជះឥទ្ធិពលដល់ចលនាកាយរឹទ្ធិក្នុង ឥណ្ឌូចិន​ និងបារាំង ។​ ដោយសារបារាំងជាប់ដៃក្នុងសង្រ្គាមលោកលើកទី២ ប្រទេសកម្ពុជាបាន ឆ្លៀតឱកាសបង្កើតចលនាមួយដើម្បីទាមទារ ឯករាជ្យ ។ ខណៈនោះដែរប្រទេសបារាំងចាប់ផ្តើមចុះ ខ្សោយឥទ្ធិពលរបស់ខ្លួន ហើយចុងក្រោយត្រូវបានដួលរលំការធ្វើ​អាណានិគមនិយមរបស់ខ្លួនលើ ប្រទេសកម្ពុជាដោយសារការធ្វើអន្តរាគមរបស់ប្រទេសជប៉ុន ហើយក៏ជាការផ្អាកសកម្ម​ភាពកាយរឹទ្ធិ បារាំងនៅក្នុងប្រទេសកម្ពុជា និងសកម្មភាពកាយ​រិទ្ធិក្នុងឥណ្ឌូចិន ។

ក្នុងឆ្នាំ១៩៥៦ ចលនារបស់ខេមរកាយរឹទ្ធិត្រូវបានផ្លាស់ប្តូរនៅក្នុង Scouts of the Queen ។ ក្នុងឆ្នាំនោះ ដែរមានចលនាខេមរ កាយរឹទ្ធិចំនួន៥០០​ក្នុងទីក្រុងភ្នំពេញ និងប្រហែល៧០០ទៀតនៅតាមបណ្តា ខេត្តក្នុងព្រះរាជាណាចក្រកម្ពុជា ។ ឆ្នាំ១៩៥៧ ក្រោមការដឹកនាំដោយផ្ទាល់របស់ព្រះអង្គម្ចាស់ នរោត្តម សីហនុ ក្រោមរបបសង្គមរាស្រ្តនិយម អង្គការខេមរកាយរឹទ្ធិកម្ពុជា​ត្រូវបានផ្លាស់ទៅជា Royal Socialist Khmer Youth យុវ័ន ដែលសព្វថ្ងៃគ្រប់គ្រងដោយរាជរដ្ឋាភិបាល ។ ក្នុងឆ្នាំ ១៩៥៥កាយរឹទ្ធិ និង មេកាយរឹទ្ធិទាំងអស់មានចំនួនសរុប២០០០​ រង់ចាំការប្រជុំកាយរិទ្ធិពិភពលោកលើកទី៨ ដែលបានប្រព្រឹត្តទៅ​នៅ​ប្រទេស កាណាដា និងលើកទី១០នៅប្រទេសហ្វីលីពីន ក្នុងឆ្នាំ១៩៥៩ ក្នុងពេលនោះក៏មានវត្តមានព្រះអង្គម្ចាស់ នរោត្តម យុវនាថជារាជបុត្ររបស់ព្រះអង្គម្ចាស់ នរោត្តម សីហនុផងដែរ ។

ថ្ងៃទី០១ វិចិ្ឆកា ១៩៦៤ ព្រះអង្គម្ចាស់ ស៊ីសុវត្ថិ អេសសារ៉ូ ជាព្រះប្រធាននៃអង្គការខេមរកាយរឹទ្ធិ កម្ពុជាបានប្រកាសរំលាយ​សមាគមយុវជនកាយរិទ្ធិកម្ពុជា (The Cambodian Boy Scout Association) ធ្វើអោយសមាជិកទាំងអស់ធ្វើសមាហវ័ណ​​នៅក្នុង Jeunesse Socialiste Royale Khmer ដែលមានការ ឧបត្ថម្ភពីរាជរដ្ឋាភិបាលក្នុងចលនាយុវជនសង្គមរាស្រ្តនិយម ។

ក្នុងឆ្នាំ១៩៧២ កាយរឹទ្ធិកម្ពុជាបានបង្កើតឡើងវិញក្នុងរយៈពេលខ្លី មានសមាសភាពតែ១០ក្រុម ដែលអាចធ្វើចលនាតែក្នុង រាជធានីភ្នំពេញប៉ុណ្ណោះ ។ ក្នុងឆ្នាំ១៩៧៥ ចលនាផ្សេងៗត្រូវបានហាម ឃាត់ដោយការត្រួតត្រារបស់របបខ្មែរក្រហម ។

ការបញ្ចូលគ្នាវិញរបស់កាយរឹទ្ធិក្រោយឆ្នាំ១៩៩៥

សញ្ញាសមាជិកភាពនៃអង្គការខេមរាកម្ពុជា គឺបានតុបតែងដោយការបញ្ចូលប្រាងប្រាសាទអង្គរនៅ​​ចំកណ្តាល ។ ដោយប្រព័ន្ធនយោបាយមានការផ្លាស់ប្តូរនៅក្នុងប្រទេស កាយរឹទ្ធិត្រូវបានកកើត ឡើងវិញហើយក្រុមកាយរិទ្ធិបានរៀបចំនៅក្នុងជំរំជនភៀសខ្លួននៅជិតព្រំប្រទល់សៀម ។ ក្រោយការបោះឆ្នោត​ ឆ្នាំ១៩៩៣ ដែលបានរៀបចំដោយអង្គការសហប្រជាជាតិ លោក Beat Gruninger ដែលជាមេកាយរឹទ្ធិស្វ៊ីស បានប្រគល់ការិយាល័យកាយរឹទ្ធិពិភព លោកអោយទៅថ្នាក់ដឹកនាំកម្ពុជាចំពោះការកើតឡើងវិញ​នៃកាយរឹទ្ធិ ក្នុងទឹកដី សន្តិភាព ។

ក្នុងឆ្នាំ១៩៩៤មានទស្សនកិច្ចចំនួនពីរដែលបានរៀបចំឡើងដោយកាយរឹទ្ធិតំបន់អាស៊ីប៉ាស៊ីហ្វិចជាការប៉ាន់ប្រមាណចំពោះ​ការអភិវឌ្ឍន៏នៃចលនាកាយរឹទ្ធិកម្ពុជា​ ។ ខែមេសា ឆ្នាំ១៩៩៦​ ការហ្វឹកហ្វឺនថ្នាក់មូលដ្ឋានដល់មេកង កាយរឹទ្ធិត្រូវបានរៀបចំ​ឡើងនៅក្នុងទីក្រុងភ្នំពេញក្រោមការជួយពីសមាគមជាតិកាយរឹទ្ធិសៀម និង កាយរឹទ្ធិអាស៊ីប៉ាស៊ីហ្វិច ។

ក្រោយមកទៀតកាយរឹទ្ធិពីរក្រុមសំខាន់ៗ អង្គការខេមរកាយរឹទ្ធិកម្ពុជា និងខេមរកាយរឹទ្ធិកម្ពុជាបាន មានវត្តមានឡើង​ក្នុងខែ កក្កដា ឆ្នាំ២០០០ ។​ សមាគមកាយរឹទ្ធិទាំងពីរក្រុមស្ថិតក្រោមការដឹកនាំរបស់គណបក្សនយោបាយប្រជែងពីរ ។ ដោយសារមូលហេតុនេះហើយទើបចលនាអង្គការកាយរឹទ្ធិពិភពលោកពុំអនុញ្ញាតអោយពួកគេចូលជាសមាជិក ។ ដោយការខិតខំ ប្រឹងប្រែងបញ្ចូលពួកគេក្នុងសមាគមជាតិថ្មីមួយ ទើបមានគណៈកម្មការសម្របសម្រួលកាយរឹទ្ធិកម្ពុជាមួយបានបង្កើតឡើង នៅថ្ងៃទី២១ ខែមេសា ឆ្នាំ ២០០១ ។ ក្រុមការងារបានបង្កើតឡើងដោយថ្នាក់ដឹកនាំពីរក្រុមនៅក្នុងខែឧសភា ឆ្នាំ២០០៥ ធ្វើការដោះស្រាយរដ្ឋធម្មនុញ្ញថ្មី និងលក្ខន្តិកៈថ្មី ។​ នៅខែកញ្ញា ឆ្នាំ២០០៥ សមាគមជាតិកាយរឹទ្ធិកម្ពុជាត្រូវបានបង្កើតឡើង ជាស្ថាពរក្រោមការឯកភាពជាតិ ។

ខែឧសភា ឆ្នាំ២០០៦ ការិយាល័យកាយរឹទ្ធិពិភពលោកប្រចាំនៅអាស៊ីប៉ាស៊ីហ្វិចបានរាយការណ៏ក្នុងសំបុត្រសារព័ត៌មាន​របស់ពួកគេចំពោះការប្រជុំទូទៅប្រចាំឆ្នាំនៃសមាគមជាតិកាយរឹទ្ធិកម្ពុជាដែលបានប្រព្រឹត្តទៅនៅខែមេសា ឆ្នាំ២០០៦​ក្នុង​រាជធានីភ្នំពេញ ។

ការិយាល័យកាយរឹទ្ធិពិភពលោកបានទទួលពាក្យស្នើសុំក្លាយជាសមាជិកភាពក្នុងចលនាអង្គការកាយរឹទ្ធិពិភពលោក​ដែល ផ្ញើមកពីសមាគមជាតិកាយរឹទ្ធិកម្ពុជានៅឆ្នាំ ២០០៧ ។ កាយរិទ្ធិប្រចាំតំបន់អាស៊ីប៉ាស៊ីហ្វិចបានធ្វើការប៉ាន់ប្រមាណក្នុងការ​រៀបចំនេះនៅខែវិចិ្ឆកា ឆ្នាំ២០០៧ ហើយពួកគេបានស្នើការអនុញ្ញាតនេះទៅចលនាអង្គការកាយរឹទ្ធិពិភពលោក និងបាន​សំរេចជាឯកច្ឆ័នដោយអនុញ្ញាតអោយសមាគមជាតិកាយរឹទ្ធិកម្ពុជាចូលជាសមាជិកពេញសិទ្ធិនៅថ្ងៃទី០១ ខែ កក្កដា ឆ្នាំ២០០៨ ។

សមាគមជាតិកាយរឹទ្ធិកម្ពុជាមានផែនការរៀបចំការប្រជុំកាយរឹទ្ធិថ្នាក់ជាតិនៅខែធ្នូ ឆ្នាំ ២០០៨​ នៅជិតប្រាសាទអង្គរវត្ត ។

ប្រវត្តិកាយរឺទ្ធិពិភពលោក

កាយរឹទ្ធិបង្កើតឡើងដោយលោក Robert Stephenson Smyth Baden Powell (B.P) ។ លោកកើតនៅថ្ងៃទី ២២ ខែកុម្ភៈ ឆ្នាំ ១៨៥៧ នៅទី ក្រុងឡុង ប្រទេសអង់គ្លេស ។

Baden Powell បានប្រលងជាប់ចូលបំរើក្នុងជួរកងទ័ពឈរជើងនៅ ប្រទេសឥណ្ឌា ពេលដែលគាត់មានអាយុ ១៩ឆ្នាំ ។

-ឆ្នាំ១៨៨៣ លោកបានទទួលរង្វាន់ KADIR "កីឡាប្រម៉ាញ់ជ្រូក ព្រៃ" (Sport La Chasse de Sanglier) ។

-លោកបានទទួលរង្វាន់ឋានៈជាឩត្តមសេនីយ ក្នុងអង្គភាពស៊ើបការ​ក្នុងឆ្នាំ ១៩៨៨ ។

-ឆ្នាំ ១៩០៧ លោកបានរៀបចំ JAMBOREES សាកល្បងនៅលើកោះ ប្រោនស៊ី (Bronsea) រយៈពេល១៦ថ្ងៃ ដោយមានការចូលរួមពីយុវជន ២០នាក់ ចែកជា ៤ក្រុមល្បាតៈ ក្រុមចចក- ក្រុមគោតូរ៉ូ- ​ក្រុមក្អែក- ក្រុម ត្រីសូម៉ុង ។

-ឆ្នាំ ១៩០៨ លោកបានចេញ​ផ្សាយសៀវភៅសំរាប់កាយរឹទ្ធិជំទង់ BOY SCOUT (ECLAIREUR) ។
-ឆ្នាំ១៩១៦ ចេញផ្សាយសៀវភៅ សំរាប់កាយរិទ្ធិប្អូន CUB-SCOUT "ជំរក​ចចក" ។

-បន្ទាប់ពីសង្រ្គាមលោកលើកទី១ (១៩១៤-១៩១៨) លោក B.P បានផ្តើមគំនិតរៀបចំ​ JAMBOREES លើកទី១​នៅទីក្រុងឡុងដ៏ ប្រទេសអង់គ្លេស ដោយមានការចូលរួមពី កាយរឹទ្ធិពិភពលោក លោកបានប្រកាសថា​ "យើងនឹងនាំគ្នាចេញដំណើរពី ទីនេះដើម្បី ធ្វើអោយចំនងសាមគ្គីភាព មាន ការរីកចំរើនតាមទស្សនៈ ភាតរភាព របស់កាយរឹទ្ធិ ទូទាំងពិភពលោក ហើយយើងអាចធ្វើអោយ សាកលលោកបានសុខ សន្តិភាព​ និង សុភមង្គល...។

-ឆ្នាំ១៩៣៧ លោកមានអាយុ៨០ឆ្នាំ បានចូលរួម JAMBOREES លើកចុងក្រោយនៅ ប្រទេស ហូឡង់ដ៏ ។ ក្រោយមកលោកបានដកខ្លួនចេញពីចលនា ទៅសំរាកនៅផ្ទះក្នុង ប្រទេសកេនញ៉ា ជាប្រទេសដែល លោកស្រឡាញ់បំផុត ។ សារចុងក្រោយរបស់លោក B.P ផ្តាំកាយរឹទ្ធិទាំងអស់ថា "មុននឹងទទួលអនិច្ចកម្ម កាយរឹទ្ធិម្នាក់ៗ ត្រូវខំប្រឹងប្រែងកសាងពិភព លោកអោយកាន់រឹតតែល្អ ឡើងជាងកាលដែលខ្លួនបាន កើតឡើងហើយរស់នៅនោះទៅទៀត ។

-លោកបានទទួលអនិច្ចកម្ម នៅថ្ងៃទី០៨ ខែ មករា ឆ្នាំ ១៩៤១ នៅ NIERY

-មកដល់បច្ចុប្បន្ន ចលនាកាយរិទ្ធិមាននៅក្នុងប្រទេសចំនួន ១៦០ សមាជិក ២៨លាននាក់ ។